Thailand 好食 (I)

嚟到泰國, 十個之中有九個半都係為咗 “揾食”, 因為D嘢好食之餘, 又豐儉由人, 食物種類又多, 一個字 ~ 正。

泰式海南雞飯

最近每次嚟曼谷第一件事梗係嚟呢檔海南雞飯醫肚, 貪佢好味得嚟又細細碟, 唔怕飽得滯, 用哂D quota。 而且我每次又梗打包盒海南雞飯上機或者返香港食。

呢檔嘅雞好嫩滑(我每次都要雞脾部份, 我唔識講, 但指吓個大脾佢就明), D飯又唔太油, 醬汁係成碟飯嘅靈魂, 所以一定要加落碟飯度一齊食, 好滋味! 雖然有埋湯送, 都幾好飲, 但我就鍾意叫支冰凍樽裝大可樂嚟送飯! 明明飲開係可口可樂架, 幾時變咗百事呢?! 飯連湯25匹, 支汽水10匹, 呢餐港幣8蚊雞。

檔雞飯响Big C向前行多幾十步就到, 見到右邊有間Orient Service Center就係架啦! 嗰度仲有其他熟食檔口。

Savoey Seafood
一直想揾間平靚正兼地道嘅泰式海鮮店, 上次嚟試咗間呢度非常出名嘅Somboon (建興), 我覺得水準不俗, 但同行嘅A姐話一般, 所以無去, 轉戰一間位於Suan Lum Night Market 嘅Savoey Seafood, 係上網見到肥仔沖個網介紹, 加上有九折coupon download, 就姑且一試。
去到飯店見到停車場泊咗唔少靚車, 心諗會唔會好貴呢? 入到去睇餐牌覺得唔算好貴, 但就唔平囉。可能大家有D餓, 於是叫咗成枱餸。 遊泰必飲嘅冬蔭公, 呢間酸辣適中, 好飲!
呢味咖喱炒蟹不俗, 隻蟹幾肥, 但嫌D汁唔夠香, 好似Somboon 嘅汁惹味D。 A姐話呢間咖喱炒蟹好味D, A姐男友J君就覺得Somboon好食D, 咁下次去邊間呢?
蝦餅好有蝦味, 但唔夠彈牙!
呢味似足我哋嘅XO醬炒帶子, 好惹味, 又平, 抵食。
燒海鮮拼盤, 有琵琶蝦、蟹、青口、粟米等, 一般啦, 隻蟹最好味, 但唔食無乜損失。

呢餐要成四舊水港紙, 但剩係咖喱炒蟹同海鮮拼盤已經兩舊幾, 仲有飲品同飯, 唔貴吖。

Doitung Coffee Shop


又係响Night Market入面嘅coffee shop, 幾好坐, 特別係行到身水身汗時過冷河嘅唔錯選擇, 不過杯飲品幾貴, 成85匹一杯, 我哋柯打咗凍朱古力同埋泰式紅茶, 杯朱古力幾好, 但紅茶就超甜, 要狂溝冰水至飲得落口, 就依然幾有茶味。