呢間意大利餐館位處民居, 唔太起眼, 好易揾唔倒。但我自從幾年前食過之後就立即愛上, 餐廳幽靜, 坐位舒適, 食物質素實在超班, 由頭盆到甜品, 我响呢度未食過唔好食嘅嘢, 我成日介紹朋友嚟, 佢哋食過都讚誇啦啦~~~價錢OK啦, 食物質素嬴哂, 起碼咁嘅價錢喺香港食唔倒咁美味嘅意大利菜。
心水推介
龍蝦湯, 意大利巴馬火腿配蜜瓜, 鵝肝, 海鮮露筍墨魚麵
煙肉包大蝦帶子都好味, 我就覺得太貴, 成50蚊港紙一舊, 唔係幾抵食, 至於味道…梗一流啦!原本想食埋甜品, 但實在太飽, 頂唔順。我之前就食過, 水準唔錯架。
弊! 掛住食, 跟住乜相都無影添!!! :(
34/1 Soi Tonson, Ploenchit Road, Bangkok 10330
Tel: 0-2252-1619, 0-2652-2922
(如果想晚飯建議先訂位, 訂位可以叫酒店職員安排。)
BTS Chit Lom 站揾Central Plaza, 然後响Central Plaza對面沿BTS條橋Phloen Chit 站方向行3-5分鐘, 見到右手邊有條大水渠就向右轉, 然後一直行, 就會見到Gianni個牌楝咗响路邊, 轉右就見到。仲揾唔倒??? 問人啦!!!
Siam Paragon 4/F Orangery 歎Smoothie
如果响超大嘅Siam Paragon 行到腳仔軟, 想揾個地方hea吓? 呢度會係個好選擇。環境好不在話吓, D水果smoothie好好飲, 價錢大概85匹一杯, 我叫咗杯芒果smoothie, 芒果味濃, 又甜, 好飲。
劉公同A姐叫埋同一款蛋糕, 係美式實的的嗰種朱古力蛋糕, 我唔識欣賞, 但佢哋就猛話幾好味!
在餐廳看到Paragon地下嘅熱鬧情況
MBK 5/F THE FIFTH food avenue
喺MBK個咁舊式嘅shopping mall有間咁型(查實唔算好型)嘅food court算係咁, 但嘢食一般, 又唔算平, 坐吓飲吓嘢OK嘅, 食嘢就揾第間啦!睇書話呢度有間好出名嘅豬手飯, 但揾唔倒, 可能今次太夜嚟啦。
