泰過癮 (2007): Thailand好買 (I)

嚟曼谷除咗食, 相信最吸引嘅係行街同買嘢, 不過宜家泰幣嘅滙率跌到得4.2幾左右(以前差唔多1兌5架), 無形中D物價貴咗十幾個巴仙, 少數怕長計呀嘛~~ 不過中高價嘅牌子同貨品真係多咗好多, 相信泰國國民嘅收入同生活水平都改善咗。雖然D嘢係比以前貴咗, 仍無減我哋購物嘅慾望, 特別係一心諗住嚟掃貨嘅A姐同J君。
(温馨提示: 聽講响林真香換錢兌得高D, 我哋換嗰陣兌4.38, 好似高少少喎, 連不嬲數口精嘅J君都話抵D, 咁我梗信佢啦。咁啱酒店對面嘅Amarin有間林真香, 所以好方便!)

第一站 ~ Amarin

除咗去林真香換錢, 呢個場仲有間好嘢, 就係响二樓嘅 “企鵝牌”(Grandslam Munsingwear)嘞, 個牌子專出golf衫, 所以D質料好通爽, 男女裝都有, 係J君至愛嘅牌子之一, 不過又真係抵, 我舊年响度買咗幾件T-shirt, 加埋都係一千蚊左右, 但有次我响香港行Sogo見到佢個counter, 一件女裝T-shirt都賣成千銀!!?? 差咁遠? 自此嚟曼谷必然嚟望吓, 睇吓有冇嘢啱。唔使問, J君又滿載而歸啦!

行“企鵝”之餘, 都可以行吓個場, 可能有驚喜架! 我就响其中間鋪頭仔買咗件得意狗仔T同埋象象拖鞋, 次次嚟都有幫襯架。

狗仔T, 隻狗仔可以出入間屋仔架, 幾得意。 250匹

象象拖鞋, 幾舒服架。 190匹

如果想寄張名信片俾自己或者俾親朋好友, 呢度嘅3樓有個counter可以代寄postcard, 一張名信片連郵費收28匹, 單買名信片一張要10匹, 唔平架, 出面一叠八張都係賣幾十匹咋。我哋一個單位寄咗一張返香港俾自己, 我嗰張收到未呢? 嘻…不過我幾日無睇信箱 :P

第二站 ~ Suan Lum Night Bazaar (以下簡稱Suan Lum)

之前响旅遊書見過呢個地方, 但唔知點解一直無嚟, 剩係識得去翟度翟, 不過次次行翟度翟都俾佢揸乾揸淨, 面油都標埋, 事關天氣熱, 嗰度路又窄, 鋪頭又密, 唔通風, 問你死未? Suan Lum同翟度翟嘅形式差唔多, 賣嘅嘢都差唔多, 但D路闊D, 加上夜晚, 起碼無咁熱先啦, 而且食肆多D又好坐D, 有D仲有冷氣添, 幾good架!

戰利品(一) : 手製迷你泰國名牌交通工具三轆仔一架